June 2015

Heen en weerloos

13:05 27 June in Rym
1 Comment

Die plaas se naam was “Twyfeling”

ek het

dit vreemd

gevind

dat die boer ‘n ongemaklikheid

as pleknaam vas sou bind

nie vreemd soos ‘n fout

of vlek nie

meer vreemd as skaars

of heilig

‘n kwesbare verklaring:

“Ek verander,

ek’s onveilig.”

 

Die plaas se naam is Twyfeling

ek wonder hoe als sou wees?

as mense se ontberings

nes bordjies uit kon lees:

“Hartseer”

“Kwaad”

“Vertwytend”

“Vergete”

“Vals”

“Vervreemd”

 

“Strydend”

“Soekend”

“Sterwend”

“Ontnugter”

“Op”

“Ontneemd”

 

Die plaas se naam is Twyfeling

ek’s nuuskierig oor die kinders

of die kleingeslag ook twyfelend

illusies wil verminder?

Deur oop en eerlik swak te wees

gemaklik en gereeld

terselfdertyd hul sterktes ken

trots en onverdeeld.

 

Die plaas se naam is Twyfeling

ek ry gereeld verby

dan sug ek aan die binnekant

want daar’s twyfelbloed in my.

 

Verby die lugleegte

13:10 05 June in Weeskinders
2 Comments

As ek jou weer sien

en jy begin praat oor die weer

werkstres

of jou kinders

gaan ek my hand op jou bors sit

direk in jou oë kyk

en jou mooi vra om eers te stop

nie omdat ek nie ook koudkry

stres oor ‘n deadline

of dink die kleingoed is dierbaar nie

maar oor ek bekommerd is oor die groewe wat ons en ons bolangse geselsies begin uitkerf

 

 

As ek jou weer sien

en ek vra jou uit oor jou nuwe toppie

daai Facebook clip

of die rugby telling

stop my asseblief

sit jou hand op my bors

kyk my in die oë

en vra my om eers te stop

nie omdat jy my nie wil vertel waar jy dit gekoop het

ook die clip geniet het

of nie die telling weet nie

maar omdat jy ingestel is op die gewig van dinge , en eerder wil weet waarom ek Sondag in die kerk so hard gehuil het

 

 

As ons mekaar weer sien

en ek vra uit

omdat ek regtig wil weet

en jy antwoord rou

want die waarheid is welkom

sal dit nie wees omdat ons ‘n kuiertjie vasgemaak het

by dieselfde partytjie opgedaag het

of albei se Skype liggies groen was nie

 

dit sal wees omdat ons bly werk aan kýk,

aan ráák

aan dit wat werklik saakmaak.

 

As ek en jy mekaar weer sien.