Langpad met Nina Simone

19:06 19 July in Rym
1 Comment

Ek en Nina
het ‘n ent gaan ry
sy’t gesing oor Bojangles
en vryheid
daar was rus in die kar
en rus in my kop
te danke aan haar nabyheid

ek en Nina
het ver gery
sy’t vertel hoe haar ma kon bid
en gebieg oor die bang
vir die dood se stop
wat steeds in haar skadus sit

‘n entjie verder
het Nina gehuil:
‘n man het haar hart gewen
in ‘n oomblik van onmoontlikheid
tot slawerny gestrem
toe’t sy harder gesing
hande geklap
haar voet in ritme gestamp
en die seer het in
‘n oogwink weer
na lieflikheid verdamp

ek en Nina
het goed gery
‘n leeftyd se grond gedek
en haar lied het van
haar hart se vlam
na myne oorgelek.

Volgende Inskrywing
Vorige Inskrywing
Tags:
Mia Smit

Mia Smit

meerkatkind@gmail.com
1Comment
  • Avatar
    enavandenberg@yahoo.com 21:34h, 19 July Reply

    Met jou oor Nina Simone, Mia. Viva Nina. En viva Mia.

Post A Comment