Draaiboek

10:35 10 April in Rym
0 Comments

Binne en buite

ons deure en ruite

huise en erwe

lande se skerwe

draai dieselfde aarde om en om

en die mensdom staan vreemd verstom:

Die groot goed lyk anders

die klein goed trek skeef

ons planne bedonnerd

gesondheid verweef

regerings op aandag

horries op hol

en die aarde bly steeds tol en tol

Party werk soos miere

ander raak stil

sommiges oefen

ander bly dril

hierdie een huil net

daardie een skree

my kleinneef in Brakpan rook breakfluid en tee

Binne en buite

ons verstaan en ons planne

sit hierdie ding duidelik in almal se hande

almal se harte

almal se lywe

se werke en kerke en eenmanbedrywe

En die aarde draai

en die mense stop

die groot mallemeule is volgeprop

dit draai om en om

vir ‘n groter kyk

hoe ons binne-buites regtig lyk.

Read More

Prentjiemooi

08:25 10 December in Weeskinders
3 Comments

Dit was nie idillies of romanties  toe ons ons huweliksherdenking in verskillende lande spandeer het nie

ons het geen filter-fotos van die aand toe ons seun in die hospitaal opgeneem is en ons hom tot in die ounag
moes platdruk en medisyne bly ingee het nie

die vuil wasgoed en skottelgoed en leë bokse en speelgoed en rekenaar en selfoonkabel en biblioteek-kaart
in ons kombuis is glad nie kunstig óf keurig gerangskik nie

jou enigste werksbroek met die klein skeurtjie op die boud, en my heeltyd-jeans, halfskoon-tekkies en truie
sal geen Pinterest bord of mode-blog haal nie

Maar jy het my daai oggend op pad Switserland toe gesoen en gesê jy gaan my mis
en ek het jou geglo

en toe ons kleinman uiteindelik ontslaan word en ons  op ‘n suurkots matras sonder beddegoed moes slaap
was ons albei so dankbaar en verlig

die naweek gaan ek hopelik tyd kry om weer huis skoon te maak
en dan lyk die kombuis weer stukke beter

daarna moet ons asseblief winkel toe gaan
om vir jou ‘n nuwe broek te soek, en skoene ook nou dat ek daaraan dink

Want jy is my man
en ek is jou vrou
en ek is so regte lewe lief vir jou.

Read More

KAKTUS

09:57 01 December in Rym
2 Comments

Die skerp stukkies in die lewe:
die ongemaklike
die skewe
die snotsnik huil
die beenmurg moeg
die fokken-orit opgee sloeg

‘n Swaarkry seisoen
‘n uitplant aksie
vuilbek vloekend
hart in traksie
as oorlewings asem
hortend hyg
en moedhou denke
styflip swyg

Volgende keer
as jou winter blom
jou kromrug knak
jou miskraam kom
volgende keer
kan jy tog wel weet:

jy’t al skerper storms deurgesweet.

Read More

Tuin

09:39 05 October in Rym
3 Comments

En toe het daar ‘n binneblom

uit my hart se hoop gebind

sy pad as saad

in mikromaat

na my lendelyf gevind

 

en daar het hy ‘n wortelloot

in my kweekhuis uitgeskiet

sy lyf gestrek

hom uit kom rek

in my eva’s grondgebied

 

en nou is ek ‘n bedding

word uitgespit, geploeg

my hart is hoog en hoopvol

my lyfie worstelwroeg

 

en die blom groei sterk en stadig

maar sy reuk is reeds só soet

en sy mamma wag geduldig

om haar grootseun te ontmoet.

Read More

Ruimtereis

14:23 03 August in Rym
0 Comments

Ek het ‘n wye wentelbaan

wat sirkel om die son

herhaalde ver verbybeweeg

herhaalde naderkom

 

ek het ‘n rus in my reis gevind

‘n wete dat ek groei

dae van sterk en seker staan

dae van bibberbloei

 

ek is ‘n krummel klein planeet

maar die son is groot,

is sterk

en ons het ons eie ruimtereis

wat hoog en heilig werk.

Read More

Fondasie

19:58 05 July in Rym
0 Comments

​’n Murmer
‘n rookwolk
‘n flikker
‘n verdwaal
dinge wat verskilfer
dinge wat herhaal
 
‘n omdraai
‘n wat-as?
‘n wegkyk
‘n onthou
woorde wat verwilder
woorde wat nog wou
 
as ek en jy deur al die dans
deur al die trap en tref
ons stemme as ‘n stilte
as ‘n hongerheid verhef
as ek en jy met skoene
as ek en jy ontbloot
deur die opdraend van ons hobbels
en die bakhand van ons brood

‘n pad kan vind wat reguit lyk
‘n pad kan vind wat stop
in die middel van die malligheid
van hart en hoop en kop
 
‘n plek kan vind met harde grond
‘n plek kan vind vir spit
sal ek en jy ‘n spoghuis bou
om saggies in te sit.

Read More

Stroom

06:57 03 July in Rym
1 Comment

​In die middel van die oopte

in die veld

in die vlak

waar die son en sy brand oor die aarde bak

op die plat van die klippe

sit ‘n akkedis

onwetend dat dit somer is

 

in die hang van die hemel

in die oop

in die blou

waar die uitkyk wyd oor die aarde vou

in die stroom van die wind

dryf ‘n arendsveer

onwetend dat hy terug sal keer

 

na die trek van die aarde

die die val van die vloer

waar die in

en die uit

van ons asems roer

na die glip van seisoene

wat onbewus

aan groter reëls gebonde is.

Read More

BRANDPUNT

15:42 30 May in Rym
0 Comments

Dit brand aan die voet van Tafelberg

rooi flikkers leksels strepe

skroei ‘n blitspad na die bladkant op

in goud-verbete repe

bollings gryswind room die vonk

skarrel-spoegend-pypies

koddig poog die Kaapse volk

met armswaaidend lyfies

 

dit brand aan die voet van Tafelberg

heel die moederstad verstik

soos die groeistem van die flitselvonk

sy pad na boontoe prik.

Read More

Huis

09:22 27 April in Rym
1 Comment

Ek bou ‘n huis uit strootjies:

die ooglopende trek van lootjies

kaarte gekies

kaarte gedeel

kanse gewaag

en kanse verspeel

wat mettertyd die paaie pak

waar my lewensspore neer kan sak

 

Ek bou ‘n huis uit foute:

bekommerd en benoude

lesse geleer

lesse gedop

liefdes probeer

en liefdes gestop

wat kollektief die stene sterk

vir die holtes van my binnekerk

 

Ek bou ‘n huis uit tyd:

werk my heil en helsvrees uit

God ontdek

God gebreek

goed gevind

en goed versteek

wat almal saam my legkaart pas

verligting teen die lewenslas

 

Ek bou ‘n huis uit rus:

veilig,warm, knus

herberg-heilig

vormfyn

plek van water bloed en wyn.

Read More

Merkwaardig

06:47 26 January in Rym
1 Comment

Alles laat ‘n merk

slegs die vingerwerk verskil

die skaafsels van die siel

weerworstel van die wil

die balsem van vergifnis

genesing van vergeet

die bitterbrand van vlak verstand

die wonderwerk van weet

 

alles laat ‘n merk

soms soos sny en soms soos soen:

fyntjies met jou mond

steeds fyner met jou doen.

Read More

Waterwerke

06:40 07 January in Rym
0 Comments

Besluite pak soos wolke saam

kleur donkerder met tyd

tot die opgaarsel ter aarde spat

in wilde bliksemstryd

 

geheime sak in druppels af

eers saggies

suutjies

stil

vergader dan in strome saam

wat kronkel en wat krul

 

en êrens in die siklus

van vryval en verdamp

waar die wonder van beweeglikheid

verspoel

verskyn

verkramp

 

is ons almal meestal water

al het sommige gevries

party is vormwerend

party is vasgekies.

Read More