Verby die lugleegte

13:10 05 June in Weeskinders
2 Comments

As ek jou weer sien

en jy begin praat oor die weer

werkstres

of jou kinders

gaan ek my hand op jou bors sit

direk in jou oë kyk

en jou mooi vra om eers te stop

nie omdat ek nie ook koudkry

stres oor ‘n deadline

of dink die kleingoed is dierbaar nie

maar oor ek bekommerd is oor die groewe wat ons en ons bolangse geselsies begin uitkerf

 

 

As ek jou weer sien

en ek vra jou uit oor jou nuwe toppie

daai Facebook clip

of die rugby telling

stop my asseblief

sit jou hand op my bors

kyk my in die oë

en vra my om eers te stop

nie omdat jy my nie wil vertel waar jy dit gekoop het

ook die clip geniet het

of nie die telling weet nie

maar omdat jy ingestel is op die gewig van dinge , en eerder wil weet waarom ek Sondag in die kerk so hard gehuil het

 

 

As ons mekaar weer sien

en ek vra uit

omdat ek regtig wil weet

en jy antwoord rou

want die waarheid is welkom

sal dit nie wees omdat ons ‘n kuiertjie vasgemaak het

by dieselfde partytjie opgedaag het

of albei se Skype liggies groen was nie

 

dit sal wees omdat ons bly werk aan kýk,

aan ráák

aan dit wat werklik saakmaak.

 

As ek en jy mekaar weer sien.

Van hartsgeheime en tydsgordyne

15:23 31 May in Weeskinders
2 Comments

Jou hart het lankal geweet

toe jou kop nog nie kon klank nie

moes leer hoe om jou potlood met drie vingers vas te hou

nog die bladsy van die lyntjiesboek bewerig probeer natrek het

 

jou hart het lankal geweet

toe jou kop tot tien, twintig, twee honderd leer tel het

gesnap het oor die links strepie van ‘n b, en die regs strepie van ‘n d,

later self die hasie ore van jou veters vas kon knoop

 

jou hart het lankal geweet

terwyl jou kop maal tafels gememoriseer het

kissing touchers op die netbalbane gespeel het

marmite broodjies op die pawiljoen geëet het

dirigente in hul shoeshine tekkies bewonder het

 

jou hart het lankal geweet

terwyl jou kop gemaklik moes raak met die vreemdheid van hoërskool

die selfvertroue van matrieks

vriende, vakke en space-case keuses moes maak

en soms op siwwie dae cool gevoel het

 

jou hart het geweet

terwyl jou kop universiteit toe is

ontdek het daai girl se notes is beter as die handboek

tot vier uur die oggend gekuier het want die vibe was net só lekker

en daai ou was net só snaaks

 

jou hart het geweet

toe jou kop met koorsige godsdienstigheid verlig het

briewe vir God geskryf het

vir die eerste keer verstaan het hoe die wêreld werk

en hoe alles opgelos gaan word

 

jou hart het steeds geweet

toe jou kop die politiek van ’n kantoor moes navigeer

werksplek woorde van kollegas moes ontsyfer

besef het dat boelies op skoolbanke en agter emboya lessenaars sit

en die soet beloning van eie geld kon ontdek

 

jou hart het geweet

toe jou kop begin twyfel het in die perfektheid van sommige kerkmense,

jou idees, en dáái verhouding,

begin besef het dat dinge buig

en alles nie voorspel, beheer of verduidelik kon word nie.

 

Jou hart het heeltyd gewéét

terwyl jou kop sporadies moes ontdek:

die lewe is ‘n groot onmoontlikheid

wat verby verstaanbaar strek.

Op Moedersdag,met liefde.

09:42 10 May in Rym
2 Comments

Hierdie is my ma
wat meer as net my gene dra
hierdie is my mens

wat gedoek het, gedra het
geleer het, gevra het
gewys het, geslaan het
met hart en siel ge-ma het

hierdie is my ma

wat betaal het en bespreek het
as ek skeeftrek of gebreek het
wat gebroodjie en gesing het
‘n regte huis gebring het

hierdie is my ma

Elsjé Magdalena voorheen Uys
jy het my so mooi gewys
mamma is ‘n sagte woord
wat in elke huis en hartklop hoort

Hierdie is my ma.

Herfs

09:00 09 May in Rym
0 Comments

As God Sy roes oor die wingerd drup
in rooi-oranje repe
en die geelbruin bars in spatsels uit
voortvarend en verbete

As die blare, bome, pruimboordbas
vervorm en vervou
in skakerings van omwenteling
wat ‘n heiligheid inhou

As die son sy sakwerk vroeër bring
om die heuningdans te doen
en my hart bly vra om nóg te kyk
hoe die die lig die landskap soen

Is ek dankbaar vir verandering
bewonderend bewus
dat die skoonheid van versirkeling
op die alledaagse rus.

Opgesom

07:50 05 May in Rym
1 Comment

“As a
dan b
maar wat van c,
as d en e
hul invloed gee?”

Somme het formules
voorspelbare skedules
maar die hart se hoort
tel anders op
totale van die lyf én kop
word opgelyn na gier en wens
tot die somwerk aan onmoontlik grens
dan opgedeel deur tyd se tik
en uitgemaal na Godsbeskik

as die syfers dan hul vorm vind
na die reistog van verdamp-herbind
miskien dan daar
kleinmoontlik dan-

kan liefde aan die groot klok hang.

Slak

14:27 30 April in Rym
1 Comment

Ingedop
kom jy aangesleep
tuin terroris met jou silwer sweep
uitpeuloë op ‘n draadloos steel
jou slymlyf glibstip spoor
glim bultend randend klippend sandend
groot gebergtes oor

so stadig
seker
stil
sekuur
die sleepwerk van jou etensuur
is haas onmoontlik imposant
jou wondervraat
jou watertand!

*met dank aan Ru vir die inspirasie.

Tydsberekening

22:11 27 April in Rym
1 Comment

Die ploeg staan reg om die grond te skeur
die veld is vasgebak
maar die reën hou terug met sy nat, sy neer
laat die oopbreek stadig, swak

Die vosperd wag gedweë, gereed
om sy sweet al slepend uit te meet
maar die plaasboer kén die regte tyd
sit nog ‘n dag geduldig uit

En die werkers raak onrustig
want die saad moet spoedig in
daar’s ‘n tyd vir wag vir beter
en ‘n tyd om te begin

en die ploeg staan reg
en die reën hou terug
en die boer kyk op
en die werkers sug
want die perd staan rond
op harde grond
en die saad lê stil
teen die hand se wil

Sien:
gereënde grond is beter
maar geleende tyd raak op
is die toegeverfde uurglas
versadig
of verstop?

Gevallestudie 1: trots

11:47 03 April in Rym
1 Comment

Die trots het op ‘n Maandag
op sy bobeen uitgeslaan
(dit was heeltemal te min
om dokter toe te gaan)

die trots het teen die Dinsdag
van sy nek tot toon versprei
(dit was definitief te vlak
om ‘n voorskrif te moes kry)

teen Woensdag het die trots
in sere uitgeblom
(hy was absoluut oortuig
dit sou vinnig gaan, en kom)

teen Vrydag middag eenuur
het sy lyf in koors gestraal
(dit was darem net onnodig
om ‘n ambulans te haal)

Saterdag was moeilik
sy tong het ophou werk
die aanslag van verwoesting
in stilte kom versterk

om Sondag middag vyfuur
het die trots sy lot beklink
“ek het heeltyd hulp gekort”
het hy veels te laat gedink.

Verligting

15:55 27 March in Rym
1 Comment

Ek merk ligte wat
die donker strem
in ons strate
in ons wees
met ongekende oorgawe
teen die duister
teen die vrees

Party is hoopvol helder
party is flikkerflou
pogings tot verskittering
wat die blindheid buite hou

Ek merk ligte
selfs,
in die rooi distrik
wat ons siele swaarheid
weg bly ruk
as opgewekte gloeilampstreep
die swart verflits in weerlig-reep

Ek merk ligte wat
met sonheid straal:
vergeelde grootheidskrag
lewensgewend helderheid
teen die niksheid van die nag

Ja,
die donkerte
is welbekend
laat ons strompel-stappend
siggestremd
maar die lig se stryd
woed ewig voort
enig in sy hart,
sy hoort

En ek sien
die Lig-geraaktes
wat die swartheid weg kom keer
‘n bastion verheldering
wat die donker bly besweer
en ek voel die laatnag uitbloei
want ek sien ‘n oopdag breek
as my meester in sy stralendheid
al die swartheid
stukkend
steek.

Gebedslys

12:39 14 March in Rym
3 Comments

Om hoop te hê
om hoop te hou
wat my menswees bymekaarhou

A:
Goeie suppliers met ‘n random fix
langtermyn liefde
gereelde kicks
draagbare waarheid
mense wat weet
werk wat ek regtig wil doen
foute vergewe
krag ontdek
‘n rugvryf ‘n vashou ‘n soen.

B:
Meer dinge beter
swaar dinge weg
Jesus so lig soos die son
dankbaar tevrede
‘n duidelike plan
gedoen wat my hart weet ek kon

boekverkope
beter skryf
gedeelde kuns
gesonde lyf
oorsese kuiers
geloof wat hou
‘n lekker date as my vriende trou.

C:
Gereelde buite
gekrimpte bang
kinders wat snaakse stuff aanvang
eerbare leef
om jammer te sê
verhouding wat langer as seks wil lê
die waarste ek in my dag gewees
hardop lag
lekker lees
wegkruiptyd alleen gegun
hartsmusiek
oorbegin

slim ontlonting van loodswaar goed
goeie keuses
mannemoed

om hoop te hê
om hoop te hou
wat dit alles bymekaarhou.